Ўзбекистон–Корея: журналистика соҳасида ҳамкорлик ривожланмоқда

2019-10-16T08:29:02+00:0016 Oktabr, 2019|Умумий янгиликлар|

Давлатимиз раҳбари Шавкат Мирзиёевнинг 2017 йил 22-25 ноябрь кунлари Корея Республикасига давлат ташрифи ўзаро муносабатларни сифат жиҳатдан янги босқичга кўтарди, кўп қиррали алоқаларни ривожлантириш учун мустаҳкам замин яратди.

Бу жараён Ўзбекистон Журналистлари иждодий уюшмаси билан Корея журналистлар ассоциацияси ўртасида ҳамкорликни йўлга қўйиш ва 2019 йилнинг 25 март куни Сеул шаҳрида шу масала бўйича келишувнинг имзоланишига ҳам туртки берди. Шунга мувофиқ ташриф буюрган кореялик журналистлар жорий йилнинг 8-14 октябрь кунлари юртимизда бўлди.

Меҳмонларнинг  мамлакатимизга ташрифи  пойтахтимизда фаолият олиб бораётган Корейс маданияти маркази, “Корё Синмун” газетаси таҳририяти, Тошкент вилоятининг Ўрта Чирчиқ туманидаги “Хван Ман Гым” музейи фаолияти, шарт-шароитлари  билан танишувдан бошланди.

Уларга Корейс маданияти маркази раиси Виктор Пак Ўзбекистонда Президентимиз Шавкат Мирзиёев бошчилигида турли миллат ва элат вакилларига  кўрсатилаётган алоҳида эътибор ва ғамхўрлик, мамлакатимизда истиқомат қилаётган корейс миллатига мансуб фуқаролар билан ишлаш, уларнинг жамиятдаги ўрни, турли соҳалардаги фаол фаолияти ҳақида сўзлаб берди.

–Ўзбекистонга бундан ўн йилча олдин, Кореянинг шу даврдаги  Президентининг юртингизга ташрифи чоғида келгандим. Орадан шунча вақт ўтгандан кейин яна мамлакатингизда бўлиш насиб этди. Ўтган йиллар, айниқса, кейинги уч йил мобайнида амалга оширилган ишлар, ўзгаришлардан ҳайратландим, – дейди Корея журналистлари ассоциацияси презитденти Жунг Кю Сунг. – Тошкент – қандайдир одамни ўзига тортади, жозибадор  шаҳар. Буни шерикларим ҳам таъкидлашмоқда. Бизга бу ерда кейинги йилларда амалга оширилаётган бунёдкорлик ишлари, хусусан,  “Тошкент сити”, эстакада усулида қурилаётган янги метро линиясининг бунёд этилиши ҳақида ҳам гапириб беришди. Ўз кўзимиз билан кўрган бу каби бунёдкорлик ишлари пойтахтингизга янада кўрк бағишлайди, муҳими, аҳолига қулайлик яратади.

Кореяликлар ташрифининг иккинчи куни ҳам мулоқотларга бой, ҳар жиҳатдан мазмунли ўтди.  “Халқ сўзи” ва «Народное слово» газеталари таҳририяти, ЎзМТРК медиа маркази, Ўзбекистон журналистика ва оммавий коммуникациялар университетида ўтказилган учрашувларда журналистларимиз, блогер ва техникларимиз кореялик ҳамкасблари билан тажриба алмашиш, дилдан суҳбатлашиш, “Мастер-класс”ларда иштирок этиш имкониятларига эга бўлдилар.

–Ўзбекистонлик журналистлар билан ҳам танишиш, дўстлашиш, суҳбатлашиш, тажриба алмашиш ёқимли ва қизиқарли,  – дейди кореялик журналист Чой Вон Жай. – Аслида журналист миллатидан, давлатидан қатъий назар битта ишни бажаради. Шунинг учун ҳам улар (икки мамлакат журналистлари) бир-бири билан учрашганида қандайдир яқинликни ҳис қилади. Эътиборли жиҳати, бу кўзга кўринмас ришта миллатларни, давлатларни бир-бирига боғлашга, соҳалар ривожига хизмат қилади.  Ўзбекистон Журналистлари иждодий уюшмаси билан Корея журналистлари ассоциацияси ўртасида тузилган ҳамкорлик келишуви ҳам шу эзгу мақсадга қаратилганига шубҳа йўқ.

–Юртимизга, таҳририятимизга кореялик ҳамкасбларимиз келганидан хурсандмиз, – дейди “Халқ сўзи” ва «Народное слово» газеталари бош муҳаррири ўринбосари Жамолиддин Тўхташев. – Иш жараёнларимиз билан яқиндан танишган меҳмонлар  билан учрашув қизғин мулоқотга айланиб кетди. Корея босма нашрларининг бугунги ҳолати ва истиқболи хусусидаги  саволларимизга  атрофлича жавоб олдик. Менга уларнинг интернет нашрлари бугун янаям оммавийлашган бўлса ҳам газета ва журналларнинг ўрни бўлакча, деган фикрлари маъқул келди. Бир-биримиздан газетачиликка оид, эртанги фаолиятимизда асқатадиган жиҳатларни ўрганганимиз, ҳамкорлик қилишга келишиб олганимиз муҳим аҳамият касб этади.

Кореяликларга ҳамроҳлик қилар эканман, улар маданиятида миллий маданиятимизга ўхшаш ва яқин жиҳатлар борлигига яна бир бор гувоҳ бўлдим. Ёши катталарга ҳурмат, болаларга айрича меҳр-оқибат каби одатларни бунга мисол қилиш мумкин.

Меҳмонларга юртимиз журналистика соҳаси ривожи хусусида маълумот берар эканмиз, уларга давлатимиз раҳбари томонидан кейинги йилларда қабул қилинган Ўзбекистон ижодкорларини қўллаб-қувватлаш “Илҳом” жамоат фондини ташкил этиш, Ўзбекистон Журналистлари ижодий уюшмаси фаолиятини янада такомиллаштириш, Маданият ва санъат ташкилотлари, ижодий уюшмалар ва оммавий ахборот воситалари фаолиятини янада ривожлантириш, соҳа ходимлари меҳнатини рағбатлантиришга оид қарорлари ижроси доирасида, матбуот ва сўз эркинлигини таъминлаш бўйича амалга оширилаётган кенг кўламли ишлар ҳақида ҳам гапириб бердик.

Шунингдек, уларга ҳар йили 27 июнь – матбуот ва оммавий ахборот воситалари ходимлари куни муносабати билан бир гуруҳ фаол журналистларимиз Президентимиз фармонига мувофиқ давлат мукофотлари билан тақдирланиши, “Олтин қалам”, “Йилнинг энг фаол журналисти”, “Энг улуғ, энг азиз” каби кўрик-танловларнинг ўтказиш тартиб-қоидалари, мукофот жамғармалари ҳақида ҳам маълумотлар тақдим этилди.

Кореялик журналистларнинг  Хоразмга сафари

Хоразмда меҳмон бўлган кореялик ҳамкасбларимиз дастлаб жорий йил  фойдаланишга топширилган Хоразм вилояти телерадиокомпаниясининг янги  биноси, бу ерда ижодий жамоа учун яратилган шароитлар билан яқиндан  танишди. Журналист эмасми, кўрсатувларни тайёрланиш жараёнлари, техникларнинг иш услублари билан қизиқди.

– Жамият ҳаётида, медиа маконда телевидениянинг ўрни ва роли катта, – дейди кореяик машҳур тележурналист Ким Сунг Хван. – Шу боис бутун дунёда ушбу соҳани ривожлантиришга алоҳида эътибор берилади, маблағ йўналтирилади. Бу борада Хоразмда телевидения соҳаси ходимлари учун яратилган шароит ва имкониятлар таҳсинга лойиқ. Вилоят телерадиокомпанияси ижодкорлари билан мулоқотимиз самимий кечди. Уларнинг қизиқишлари ва ўзаро мулоқот мавзусидан шуни англаш мумкинки, соҳада ўзаро ҳамкорликни ривожлантириш истиқболлари ниҳоятда кенг ва ҳар иккала томон учун ҳам манфаатли.

Вилоят телерадиокомпаниясида икки мамлакат журналистлари иштирокида ўтказилган давра суҳбати қизғин мулоқот, савол-жавобларга бой тарзда ўтди. Икки давлат журналистлари анжумани бундан бошқача бўлиши ҳам мумкин эмас аслида. Суҳбат давомида ўзаро ижодий ҳамкорликнинг бардавомлигини таъминлаш, энг илғор тажрибалар билан доимо ўртоқлашиб туриш, он-лайн алоқа имкониятларидан самарали фойдаланиш бўйича сўз юритилди.

Шундан сўнг меҳмонлар Урганч шаҳридаги “Дўстлик уйи”да бўлди.

–  Ўзбекистон Кореяга нисбатан кўп миллатли мамлакат, – дейди Корея журналистлар ассоциацияси ижрочи директори ўринбосари Ким Донг Ки . – Тошкент ва Хоразмда бўлиб бунга гувоҳ бўлиб турибман. Юртингизда истиқомат қилаётган турли миллат ва элат вакилларининг тинч ва дўстона ҳаётига ҳавас қилса арзийди.

Хива ўзининг тарихий обидалари, муқаддас қадамжолари билан хорижликлар эътиборини ўзига тортади. Икки кун давомида Хоразмда бўлган меҳмонлар Хивадаги “Ичан қалъа” мажмуи, шаҳардаги музей, масжид ва ёдгорликларни зиёрат қилиб, улар билан боғлиқ  қимматли маълумотларга эга бўлдилар.

– Хивадаги обидалар бизни беҳад мафтун этди, – дейди биз билан суҳбатда “Hokook ilbo” филиали президенти Ким Суи Ван. – Шарқнинг ўзига хос бетакрор анъаналарини ўзида мужассам этган “Ичан қалъа” билан ҳар қанча фахрлансангиз арзийди. Ўйлашимча, бундай тарихий манзиллар камдан-кам давлатда учрайди. Албатта, бу ерда олган таассуротларимни Кореяда яқинларим ва ҳамкасбларимга сўзлаб бераман. Корея ОАВлари учун материаллар тайёрлаш учун маълумотлар йиғаяпман.

Хоразмлик журналистлар билан самимий ва очиқ мулоқотлар, дўстона учрашувлар ҳамда очиқ осмон остидаги музей шаҳарга саёҳат меҳмонларда катта таассурот қолдирди.

Самарқандда  Корея Журналистлар ассоциациясининг халқаро журналистика маркази очилади 

Халқимиз меҳмондўст. Самарқанд темирйўл вокзалида кореяликларни вилоят ҳокимининг ўринбосари Р.Қобилов, кенг жамоатчилик вакиллари ҳамда журналистлар кутиб олди.

Меҳмонлар дастлаб вилоят матбуот уйида “Зарафшон” ва “Самаркандский вестник”, “Овози Самарқанд” газеталари таҳририятлари, Ўзбекистон Журналистлари ижодий уюшмаси вилоят бўлими фаолияти билан танишди.

Зарафшон воҳаси матбуоти тарихи музейи кореялик журналистларда катта қизиқиш ўйғотди.

– Самарқанд Ўзбекистон журналистикасининг асосий бешикларидан бири бўлгани жуда эътиборли, – дейди Корея Журналистлар ассоциацияси президенти Жунг Кю Cун. – Чунки Самарқанд Буюк Ипак йўлининг марказида жойлашгани билан тарихий аҳамиятга эга. Албатта, бундай масканда матбуотнинг ташкил этилиши ва ривожланиши табиий. Биз келгусида самарқандлик журналистлар билан ҳам ўзаро ҳамкорлик қилишга тайёрмиз.

Мамлакатларимиз географик жиҳатдан бир-биридан узоқ, лекин кўнгли яқин, тинчлик ва тараққиёт йўлида мақсади муштарак давлатлардир. Самарқанддаги “Афросиёб” музейида сақланаётган деворий суратларда VII аср ўрталарида Самарқанд ҳукмдорининг қадимги Корея – Чосон элчисини қабул қилиш маросими акс эттирилгани  ўзаро борди-келдилар узоқ йиллик тарихга эга эканини англатади.

Бу анъаналар бугун ҳам давом этмоқда. 2018 йили Корея халқаро ҳамкорлик агентлиги (KOICA) ҳомийлигида Самарқанд давлат чет тиллар институтида ўқув марказнинг ташкил этилгани бунга кичик мисолдир.  Институтда самарқандлик ёшларнинг инглиз, француз, рус, корейс каби турли хорижий тилларини пухта ўзлаштираётгани меҳмонларда катта таассурот қолдирди.

Мазкур даргоҳда 2001 йилдан буён корейс тили мутахассислиги бўйича кадрлар тайёрланади. Шунингдек, институт Кореядаги олий таълим муассасалари билан ҳамкорлик ўрнатган.

Учрашув чоғида келгусида бу ерда Корея журналистлар ассоциациясининг халқаро журналистика маркази фаолиятини ҳам йўлга қўйиш борасида фикр алмашилди.

Вилоятга ташриф доирасида кореяликлар “Амир Темур” мажмуаси, Регистон майдони, “Афросиёб” музейи ва Самарқанддаги бошқа бир қатор тарихий-маданий ёдгорликларни ҳам томоша қилди.  Улар “Конигил мероси” қоғоз ишлаб чиқариш оилавий корхонасида ҳам бўлиб, қоғоз тайёрланиш жараёнларини ўз кўзи билан кўрди.

Якшанба куни Самарқанддан “Афросиёб” тезюрар поездида Тошкентга қайтиб келган меҳмонлар пойтахтимизнинг диққатга сазовор жойларига саёҳатни давом эттирди. Шу куни Кореялик журналистлар делегацияси аъзолари билан бўлиб ўтган мулоқотда Ўзбекистон Журналистлари ижодий уюшмаси раиси Саъдулла Ҳакимов уларга Уюшма фаолияти, давлатимиз раҳбари томонидан миллий журналистикамизни янада ривожлантириш, сўз ва матбуот эркинлигини қўллаб-қувватлаш борасида кўрсатилаётган эътибор хусусида сўзлаб берди.

Барча соҳада, хусусан, журналистика соҳасида ҳам ҳамкорликни, тажриба алмашишни йўлга қўйиш, ривожлантириш соҳа ривожига, қолаверса, халқларни бир-бирига  яқинлаштиришга  хизмат қилади.  Уюшмамиз томонидан бу борада амалга оширилаётган ишлардан кўзланган асосий мақсад ҳам  шу аслида.

 

Холмурод  САЛИМОВ,

Ўзбекистон Журналистлари ижодий

уюшмаси раиси ўринбосари