A’zolik tartibi2020-03-19T09:57:25+00:00

O‘zbekiston Jurnalistlari ijodiy uyushmasi a’zoligiga qabul qilish,  kirish va a’zolik badallarini to‘lash tartibi to‘g‘risida

NIZOM

 Umumiy qoidalar

  1. 1. Ushbu Nizom O‘zbekiston Jurnalistlari ijodiy uyushmasi (bundan buyon Uyushma deb yuritiladi) a’zoligiga qabul qilish tartiblari, kirish va a’zolik badallarining turi,  miqdori,   to‘lash muddati, tartibi va davriyligini belgilaydi.
  2. 2. Ushbu Nizom O‘zbekiston Respublikasi qonunchiligiga va Uyushmaning Ustaviga muvofiq ishlab chiqilgan va Uyushmaning ustav maqsadlari va faoliyatiga zid emas.

 

  1. O‘zJIUga a’zo bo‘lish tartibi

2.1. O‘zJIU Ustavini tan oladigan, matbuot va ommaviy axborot vositalarida kamida uch yillik ish stajiga ega ijodiy xodimlar, shuningdek yuridik shaxsda shtatlar jadvali asosida mehnat qilmasa ham jurnalistik faoliyat bilan muntazam shug‘ullanib kelayotgan, shu bilan birga jurnalistika sohasida ilmiy-tadqiqotchilik, pedagogik, tashkilotchilik faoliyati olib borayotgan, kirish badalini to‘lagan, o‘n sakkiz yoshga to‘lgan va O‘zJIU faoliyatida shaxsan ishtirok etayotgan shaxslar O‘zJIU a’zosi bo‘lishi mumkin.

Buning uchun nomzodning markaziy matbuotda yigirmadan ziyod, shu bilan birga, tegishili ravishda Qoraqalpog‘iston Respublikasi, viloyatlar va Toshkent shahri miqyosida qirqdan ziyod materiallari (maqolalari) yoxud publitsistikaga oid kamida bitta risolasi e’lon qilingan bo‘lishi lozim (Uyushma Ustavining 3.1.1 bandi).

2.2. O‘zJIUga a’zolik nomzodning Rais nomiga yozgan arizasi, O‘zJIU a’zosi bo‘lgan ikki nafar jurnalistning tavsifnomasi, tegishliligiga ko‘ra Qoraqalpog‘iston Respublikasi, viloyatlar va Toshkent shahri bo‘linmalari tavsiyasi bilan O‘zJIU Boshqaruvi qaroriga asosan amalga oshiriladi. O‘zJIU a’zolariga a’zolik bileti hamda O‘zJIUning ko‘krak belgisi Respublika Boshqaruvi yig‘ilishida topshiriladi (Uyushma Ustavining 3.1.2 bandi).

2.3. O‘zJIU tomonidan a’zolikka qabul qilish bo‘yicha tegishli hujjatlar kelib tushgan kundan boshlab uch oy ichida ko‘rib chiqiladi va tegishli qaror qabul qilish uchun navbatdagi Boshqaruv yig‘ilishiga kiritiladi (Uyushma Ustavining 3.1.3 bandi).

2.4.Muqaddam O‘zJIU a’zosi bo‘lgan kasbiy faoliyatini to‘xtatgan jurnalistika faxriylarining O‘zJIUga a’zoligi tegishli badallar to‘lanmagan holda saqlab qolinadi (Uyushma Ustavining 3.1.4 bandi).

2.5. O‘zbekiston Jurnalistlari ijodiy uyushmasi a’zoligiga qabul qilinishi mumkin bo‘lgan «ijodiy xodimlar» tushunchasiga:

a) ommaviy axborot vositalari – gazeta, jurnallar, axborot agentliklari, tele va radiokanallar, veb-saytlarda jurnalistik faoliyat olib borayotgan xodimlar, blogerlar;

b) teleradiokanallar rejissyorlari, teleko‘rsatuv va radioeshittirishlar boshlovchilari;

v) nashriyotlar  xodimlari;

g) jurnalist kadrlar tayyorlovchi oliy o‘quv yurtlaridagi  sohaga oid fanlar o‘qituvchilari;

d) OAVning fotojurnalistlari,

ye) mamlakatda tegishli tartibda ro‘yxatdan o‘tgan OAV bilan  ijodiy  hamkorlik qiluvchi erkin jurnalistlar  kiradi.

2.6.O‘zbekiston Jurnalistlari ijodiy uyushmasiga a’zo  bo‘luvchilar shaxsan quyidagi hujjatlarni  taqdim etishlari lozim:

a) a’zolikka qabul qilish to‘g‘risida ariza;

b) ish joyidan  tavsiyanoma; (erkin ijodkorlardan ish joyidan tavsiyanoma so‘ralmaydi)

v) tarjimai hol;

g) 2 nafar uyushma a’zosidan yoki kamida 5 yillik ish tajribasiga ega 2 nafar jurnalistdan tavsiyanoma;

d) a’zolikka nomzodning ijodiy salohiyatini aks ettiruvchi  matbuotda chop etilgan,  televideniye va radioda efirga uzatilgan, internet saytlarida e’lon qilingan  materiallari ro‘yxati;

ye) 3 x  4  o‘lchamidagi  (4 dona) fotosurati;

2.7. Nomzodlar O‘zbekiston Jurnalistlari ijodiy uyushmasi Ustavi bilan tanishligi, uning qoidalari  va  qabul  tartibiga roziligi uyushmaga a’zo bo‘lish uchun ariza qabul qilishga asos bo‘ladi.  Bu jihatlar  arizada yozma ravishda o‘z aksini topishi lozim.

Tavsiyanomalarda nomzodning ijodi haqida qisqa va lo‘nda (bir qog‘ozda) ma’lumotlar aks etishi lozim. Tavsiya beruvchilar o‘zi tavsiya etayotgan shaxsni yaxshi tanishi, nomzod Uyushma a’zoligiga har jihatdan munosib ekaniga mas’ul sanaladi. Tavsiyanomalar  olti oy davomida kuchda bo‘ladi.

2.8.O‘zbekiston Jurnalistlari ijodiy uyushmasining Ustaviga muvofiq a’zolikka qabul qilinganlik to‘g‘risidagi  qaror  Respublika Jurnalistlari ijodiy uyushmasi boshqaruvida tasdiqlangandan keyin kuchga kiradi. ( Ustavning 3.1.3 bandi)

2.9.A’zolikka  qabul qilishda  mas’uliyatni oshirish, shuningdek,  nomzodning kasbiy mahoratini xolis baholash maqsadida O‘zJIU boshqaruvi, hududiy bo‘limlar boshqaruvlari qabul qilish ishini ko‘rib chiqishni  yuqori  kasbiy darajaga  javob beruvchi  materiallar  taqdim etilgunga qadar qoldirish huquqiga ega.  Bunday holatlarda  hujjatlar  a’zolikka nomzodga qaytarib beriladi.

2.10.Arizasi hududiy  bo‘limlar  boshqaruvi tomonidan rad etilgan a’zolikka  nomzodning appelyatsiyasi  Respublika Jurnalistlari ijodiy uyushmasi boshqaruvi tomonidan  ko‘rib chiqiladi.

2.11.Appelyatsiya  ariza ko‘rib chiqilgan  kundan  boshlab o‘n kun davomida berilishi mumkin.

2.12.O‘zJIU boshqaruvi  hududiy bo‘limlar  boshqaruvlariga  appelyatsiyani  qayta ko‘rib chiqishni topshirishi mumkin.

2.13.O‘zJIU a’zolari O‘zbekiston Jurnalistlari ijodiy uyushmasi  boshqaruvi tomonidan berilgan  yagona namunadagi bilet va ko‘krak belgisiga ega bo‘ladi. (A’zolik bileti va ko‘krak nishoni  namunasi  ilova qilinadi)

2.14.O‘zJIU a’zoligidan chiqarish tartibi;

a) O‘zJIU maqsad va vazifalariga zid faoliyat olib borganda;

b)O‘zJIU Ustavi talablarini qo‘pol ravishda buzganda;

v)Jurnalist axloq-odob me’yorlariga amal qilmaganda;

g) sababsiz bir  yil ijodiy faoliyat bilan shug‘ullanmagan taqdirda

d) o‘z arizasiga binoan.

 

3.KIRISh VA AZOLIK BADALLARI MIQDORI VA TO‘LASh TARTIBI

  1. 3. 1. O‘zJIU a’zoligiga kirish badali bir marta to‘lanadi. Kirish badali mamlakatda belgilangan bazaviy hisoblash miqdorining 50 foizi (101.365 so‘m), yillik a’zolik badali bazaviy hisoblash miqdorining 20 foizi (40. 546 so‘m) miqdorida belgilanadi.   Ishlayotgan faxriylar uchun yillik a’zolik badali bazaviy hisoblash miqdorining 10 foizi miqdorida belgilanadi. Uyushmaga kirish va a’zolik badali Uyushma markaziy apparati hisob raqamiga o‘tkaziladi.

3.2.Uyushmaning 2019 yil 17 iyul kuni bo‘lib o‘tgan konferensiyasida tasdiqlangan  a’zolik  badali (belgilangan a’zolik badali miqdori) O‘zJIU a’zosi tomonidan har yili 1 mart kuniga qadar to‘lanadi.

3.3.Uyushmaga a’zolik badali qabul qilinishi, tegishli tartibda qayd etib boriladi. A’zolik badali to‘lanmagan taqdirda a’zolik bileti haqiqiy emas, deb topiladi.

3.4.Uyushma a’zosi yillik badallarni to‘lash majburiyatini muddatidan oldin bajarishga haqli.  Bir yildan ortiq vaqt mobaynida badallar muddatidan oldin to‘langan taqdirda to‘lov joriy yil uchun belgilangan miqdorda amalga oshiriladi.

3.5.Kirish va a’zolik badallarini to‘lash Uyushma hisob raqamiga o‘tkazish orqali amalga oshiriladi.

3.6.Badallarni to‘laydigan Uyushma a’zolariga hisob-kitoblarni amalga oshirish uchun tegishli hujjatlar rasmiylashtiriladi, belgilangan badal pulini to‘laganini tasdiqlovchi hujjat – chek beriladi.

3.7.Yillik a’zolik badali miqdoriga o‘zgartirishlar kiritish O‘zJIU konferensiyasida ko‘rib chiqiladi.  O‘zJIU a’zolari a’zolik badali miqdori o‘zgargani haqida (o‘zgartishlar kuchga kirgunga qadar kamida o‘n besh kun oldin)  yozma ravishda xabardor qilinishi kerak yoki xabardorligi aniqlanishi zarur.

3.8.Belgilangan muddatda a’zolik badali to‘lanmagan taqdirda,  Uyushma tomonidan a’zolik badalini to‘lamagan a’zoga Uyushma Ustavi buzilganligi haqida ogohlantirish beriladi. Ogohlantirish berilgan kuni  30 kun ichida qarzni to‘lash taklifi bildirilgan xabarnoma yuboriladi.  Agar Uyushma a’zosi ogohlantirishda ko‘rsatilgan muddatda qarzni to‘lamagan bo‘lsa,  uni O‘zJIU  a’zolaridan chiqarib tashlash masalasi Uyushma boshqaruvi yig‘ilishiga kiritiladi. Agar qarz ikki yildan ortiq vaqt mobaynida ham to‘lanmasa,  O‘zJIU  boshqaruvi majlisi o‘tkazmay a’zolikdan chiqarib tashlash to‘g‘risida qaror qabul qilish mumkin.

3.9.  O‘zJIU a’zolik tarkibidan chiqqan yoki chiqarib yuborilgan Uyushma a’zolari kirish yoki a’zolik badallari sifatida to‘langan mablag‘larini qaytarishni,  shuningdek,  O‘zJIU ga a’zolik bilan bog‘liq boshqa xarajatlari qoplanishini talab qilishga haqli emas.

 

  1. AZOLIK BADALLARINI TAQSIMLASh
  2. 1. O‘zJIU a’zolaridan Uyushma hisob raqamiga tushgan mablag‘lar O‘zJIU markaziy apparati tomonidan a’zolik bileti va ko‘krak belgisi xarajatlarini qoplash, O‘zJIU a’zolari va faxriy jurnalistlar salomatligini tiklash, amaldagi qonunchilik va Uyushma ustaviga zid bo‘lmagan boshqa maqsadlar uchun foydalaniladi.
  3. YaKUNIY QOIDALAR
  4. 1. Ushbu Nizom 2019 yilning 17 iyulidan kuchga kiradi.